50༄༅།།བོད་ཡིག་གནའ་དཔེ་བྲིས་མའི་ཁྲོད་ཀྱི་བམ་པོ་ཞེས་པའི་ཐ་སྙད་ཀྱི་འཕེལ་རིམ་དང་བྱེད་ནུས།འབྲུག་སེང་རྒྱལ།(སི་ཁྲོན་ཞིང་ཆེན་རྔ་བ་དགེ་འོས་སློབ་ཆེན།སི་ཁྲོན་རྔ་བ།624000)[གནད་བསྡུས]བོད་ཡིག་གནའ་དཔེ་བྲིས་མ་ནི་དར་སྔ་ཞིང་བོད་ཀྱི་རིག་གནས་ལོ་རྒྱུས་སྟེང་གོ་གནས་གལ་ཆེན་ཞིག་ཟིན་ཡོད།ལྷག་པར་ཉེ་བའི་ལོ་འགའི་ནང་གནའ་དཔེ་དག་སྒྲིག་དང་།ལེགས་སྒྲིག།དཔེ་སྐྲུན་བཅས་ཀྱི་ཕྱོགས་ནས་ལས་ཀ་བགྱི་མཁན་མང་དུ་ཕྱིན་ཡོད།དེ་དང་བསྟུན་ནས་གནའ་དཔེར་ཞིབ་འཇུག་དང་རྒྱུས་ལོན་བྱེད་མཁན་ཡང་ཇེ་མང་དུ་ཕྱིན།དུས་རབས་ཉི་ཤུ་པའི་སྟོད་དུ་རང་རྒྱལ་ནུབ་ལྗོངས་ས་ཁུལ་གྱི་ཏུན་ཧོང་གི་ས་ཆར་གནའ་བོའི་ཤོག་དྲིལ་བྲིས་མའི་སྐོར་མང་པོ་རྙེད་ཅིང་།དེ་དག་ནི་གྲངས་འབོར་མང་ཞིང་།ནང་དོན་ཕུན་སུམ་ཚོགས་ལ།གཙོ་བོ་བོད་ཀྱི་རིག་གནས་དང་ལོ་རྒྱུས།རྩོམ་རིག།ནང་བསྟན།སྐར་རྩིས།གསོ་བ་རིག་པ་སོགས་ཀྱི་སྐོར་ལ་ཞིབ་འཇུག་བྱེད་པར་ཚད་ཐུབ་ཀྱི་དཔྱད་གཞི་གལ་ཆེན་དུ་གྱུར་ཡོད་པར་མ་ཟད།ད་ལྟའི་བར་རྒྱལ་ཁབ་ཕྱི་ནང་གི་ཞིབ་འཇུག་པ་མང་པོས་འདིའི་ཕྱོགས་ནས་གྲུབ་འབྲས་ཀྱང་གང་འཚམ་བླངས་ཡོད།འདིར་ལོ་རྒྱུས་ཞིབ་བསྡུར་རིག་པ་དང་ལོ་རྒྱུས་ཡིག་ཚང་རིག་པའི་བྱེད་ཐབས་ཀྱིས་བོད་ཡིག་གནའ་དཔེ་བྲིས་མའི་ཁྲོད་ཀྱི་བམ་པོ་ཞེས་པའི་ཐ་སྙད་ཀྱི་འཇུག་ཡུལ་ནི་བོད་ཡ...
